ஏலகிரிக்குப்போகலாம்!

வேலுர் அருகே   ஏலகிரிமலைக்கு   காலனியில் உள்ள குடும்பத்தினர் அனைவருமாக உல்லாசப்பயணம் சென்றுவந்தோம்.

 

வெயிலூராக மாறிவிட்ட வேலூர் மாவட்டத்தின் தென்மேற்கு எல்லையில் இயற்கை எழில் கொஞ்சும் ஏலகிரி மலை அமைந்துள்ளது. கடல் மட்டத்தில் இருந்து 1410.60 மீட்டர் உயரத்தில் அமைந்துள்ள இப்பகுதியில் கோடையில் இதமான, மிதமான வெப்பநிலையில் தென்றல் வீசுவது சிறப்பு.


  இதுமட்டுமன்றி, மொத்தம் இருக்கும் 14 கொண்டை ஊசி வளைவுகளுக்கும், காரி, பாரி, ஓரி, ஔவையார், கபிலர், கம்பர், இளங்கோ, திருவள்ளுவர், பாரதியார், பாவேந்தர் எனத் தமிழ் வளர்த்த புலவர்கள், அரசர்களின் பெயர்கள். சாலைகள் அனைத்தும் பளிச்சென, புத்துயிர் பெற்று, பள்ளம் மேடின்றி, அழகாகப் பராமரிக்கப்பட்டிருந்தன.

 

ஊட்டி கொடைக்கானல்போல  பணக்காரத்தனம் கிடையாது. அதற்காக ஏழ்மையின் சோகமும் இல்லாமல்  மத்தியதரக்குடும்பத்தினரின்  நிலையில்  உள்ள மலைவாசஸ்தலம் இது.

 

 

  வேலூர் மாவட்ட மக்களுக்கு மட்டுமன்றி, கிருஷ்ணகிரி, தருமபுரி, ஒசூர், பெங்களூர் பகுதி மக்களுக்கும் ஏற்ற இடமாக இருக்கிறது.  பெங்களூரிலிருந்து காரில் சுமார் 4 மணி நேர பயணத்தில் ஏலகிரியை அடைய முடியும் என்ற சூழல் இருக்கிறது. அருகில்  இருப்பவர்கள், மடித்துக்கட்டிய வேட்டியுடன், இரு சக்கர வாகனங்களிலேயேகுடும்பத்துடன்

அருகில்  இருப்பவர்கள், மடித்துக்கட்டிய வேட்டியுடன், இரு சக்கர வாகனங்களிலேயேகுடும்பத்துடன் நேராக ஏலகிரி மலைக்கு வந்து விடுகின்றனர்.   அடுத்ததாக, புங்கனூர் கிராமத்தில் இருக்கும் ஏரி. ஏலகிரியில் படகு சவாரி செய்வதற்கான மிகப் பெரிய ஏரி இது. இங்கு குழந்தைகள் முதல் பெரியவர்கள் எனப் பலர் ஒரே நேரத்தில் சவாரி செய்வதற்கான வகை, வகையான படகுகள் உள்ளன. சுற்றுக்கு ஏற்றவாறு கட்டணம் வசூலிக்கிறார்கள்.   ஒரு சுற்று நாங்களும் போய் வந்தோம். வசந்தகால நதிகளிலே வைரமணி நீரலைகள் என்று மூன்றுமுடிச்சு சினிமாவில் இதே போல படகில்  கதாநாயகன் வில்லன் கதாநாயகி செல்லும்போது பாடும் பாடலை என் தோழி பாடினாள்..”பாட்டு கடைசில வில்லன் கதாநாயகனை தண்ணில தள்ளிவிட்டுவான் அந்தமாதிரி இங்க நடந்திருக்குதா  ?” என்று படகை செலுத்துபவரிடம் கேட்டாள்.   “எதுக்குங்க சினிமால உள்ளது வாழ்க்கைல நடக்கணுமா? அப்படி எதுவும் நடந்ததே இல்லை இங்க.40அடிக்குமேல நீரின் ஆழம் இங்க ஒருதடவை கூட எங்கள்படகிலிருந்து யாரும் நீரில் விழுந்ததில்லை... நாங்க கவனமாய் செலுத்துவோம்” என்றார் சற்றே உரத்த குரலில்.    படகோட்டியை பேட்டி கண்டேன் பயணத்தின் போது.  கைவலிக்க துடுப்பை செலுத்தும் அவர்களின் வாழ்க்கையைக்கேட்கையில் ஏரியின் நீர்மட்டம்எங்கள்கண்ணீரால்நிறைந்துவிடும்போல் ஆனது.       படகுத் துறைக்கு எதிரேயே இயற்கைப் பூங்கா அமைத்திருக்கின்றனர் சுற்றுலாதுறையினர். இதை தனியார் நிறுவனம் பராமரித்து வருகிறது. புல்வெளிப் பூங்கா இது. இதன் நடைபாதையின் இரு பக்கமும் பச்சைப் பசேலெனப் புல் தரைகள், அழகான செடிகள், 5 செயற்கை நீரூற்றுகள்,இசைக்குஏற்பநடனமாடும் செயற்கைநீரூற்று,செயற்கையாகவே உருவாக்கப்பட்டசிற்றருவி,தொட்டிகளில் பார்வைக்குவைக்கப்பட்டமீன்கள் மற்றும் ரோஜாப் பூந்தோட்டம் என அழகின் அத்தனைஅம்சங்களையும்கொண்டிருக்கிறது.பூங்காநகரமான பெங்களூர்வாசிகளுக்குஇதுஒன்றும்புதுமை இல்லையென்றாலும் மற்றவர்கள் ரசிக்கும்படி இருக்கிறது.     புங்கனூருக்கு மிக அருகே இருக்கும் அத்தனாவூர். அங்கிருந்து 3 கி.மீ. தூரத்தில் பாராகிளைடிங் திருவிழா நடைபெறும் இடம் இருக்கிறது. திருவிழா நாட்களில் மட்டுமே இங்கு கூட்டம் அதிகம் காணப்படும் என்கிறார்கள்.மற்றபடி  ஊட்டிகொடைக்கானல் ஏற்காடு போல இங்கே மக்கள் அதிகமில்லை.     அங்கிருந்து 8 கி.மீ. தூரத்தில் நிலாவூர் இருக்கிறது. அங்கு அம்மன் கோயிலும், அதையொட்டிய சிறு பூங்காவும் உண்டு. மலைகளில் இருந்து பெருகி, வழிந்தோடி வரும் ஓடை நீரைச் சேமித்து, சிறு படகு நிலையம் அமைத்திருக்கின்றனர்.     காட்டு வழிப் பயணமாக, அங்கிருந்து மலைப் பாதையில் 8 கி.மீ. தூரம் நடந்து சென்றால் ஜலகாம்பாறை முருகன் கோயில் இருக்கிறது. காட்டு வழியில், மூலிகைச் செடிகள், புதர் மண்டிய இடங்கள், உயர்ந்து வளர்ந்த பல வகை மரங்கள், வன விலங்குகளைக் காண முடியும். வானரங்கள் கனி கொடுத்து மந்திகளோடு கொஞ்சும் காட்சியையும் காணலாம். அருகேயிருக்கும் மங்கலம் கிராமத்துக்குச் சென்றால், சுவாமி மலை கோயிலுக்குச் செல்ல 4 கி.மீ. தூரத்துக்கு காட்டுவழிப் பாதை இருக்கிறது  என்றார்கள் நாங்கள் அங்கு போகவில்லை.     ஆண்டுக்கு ஒரு முறை அரசால் நடத்தப்படும் கோடை விழா தவிர்த்து, இங்கு வாகனப் பெருக்கம் அவ்வளவாகக் கிடையாது. பேருந்து நிலையம் இல்லை.   ”ஏலகிரின்னு பெயர் இருக்கே ஏலக்காய் இங்க விலை மலிவா கிடைக்குமா ?” பாயசத்திற்கு  மணக்கமணக்க அள்ளிப்போடலாம் என்னும் ஒரு நடுத்தரக்குடும்பத்துப்பெண்ணிற்கே உரிய மன ஓட்டத்துடன்  அங்கே தென்பட்ட நபரிடம் கேட்டேன். அவர்”அதெல்லாம்இல்லீங்க...பேருக்கும் ஊருக்கும்சம்பந்தம் இல்லைங்க....முன்னஇருந்திச்சோ என்னவோ தெரியாதுங்க:” என்றார்.   ஏரிக்குப்போகிற வழியில்  ராமர்பழம் சீதாப்பழம் பலாப்பழம் விளாம்பழம்    என கூறுகட்டி  சாலையில்அடிவாரப்பகுதியைவிடவும் அதிகப்படிவிலையில் விற்கிறார்கள். மலைத்தேன் என பாட்டிலில்  அடைத்து கொள்ளைவிலையும் சொல்கிறார்கள்.தேனா வெல்லப்பாகா என்று லேசாய் சந்தேகம் வருவதை  தவிர்க்கமுடியவில்லை!     ஆட்டோக்களின் நெரிசல் இல்லை. அமைதியான சூழல்; கோடையில் அளவுக்கு ஏற்ற குளிர், மழைக்காலத்தில் உறையவைக்கும் குளிர் எனச் சூழலுக்கு ஏற்றவாறு, தன்னை மாற்றிக்கொண்டு, இன்றும் இயற்கையின் இன்னிசையை வெளிப்படுத்துகிறது ஏலகிரி.! நன்றி  கட்டுரையை மே  இதழில் வெளியிட்ட ஓம்சக்தி மாத இதழுக்கு)   -- -- **

மேலும் படிக்க... "ஏலகிரிக்குப்போகலாம்!"