பெருசு (கவிதை)

தவித்த வாய்க்கு நெஞ்சு நனைக்க
தண்ணீர் கொடுத்ததில்லை
தற்போது தாராளக் குளியலில்
உடம்பே நனைகிறது.

பொங்கலுக்கே கிட்டாத புதுத்துணிப்
போர்த்திக்கிடக்கிறது உடல்முழுதும்
கனவில்மட்டுமே அனுபவித்த சந்தனமும் சவ்வாதும்
கையிலும் காலிலும் மணக்கிறது.

புத்தகம்படிக்க சிறுவிளக்கு தந்ததில்லை
புதுக்குத்துவிளக்கு இன்று பூரித்து எரிகிறது.

அதட்டி விரட்டி ஒடுக்கிய குரல்கள் எல்லாம்
அழுகை பொங்க அல்றிட
அமைதியாய் கண்மூடி
அப்படியே கிடக்கிறது,

வீட்டுப்பெருசு என்று நேற்றுவரை
அழைக்கப்பட்ட
இன்றைய சவம்.

	Tweet